Баскетболды дамыту үшін Қазақстан FIBA-мен бірлесіп жұмыс істейді

Қазақстанда бұқаралық және кәсіби баскетболды дамытуға басымдық берілмек. Бүгін Президент Қасым-Жомарт Тоқаев Халықаралық баскетбол федерациясының Президенті шейх Сауд Али Әл-Тәниді қабылдады. Кездесуде федерациямен бірлескен жобаларды іске асыру мәселесі талқыланды. Биыл елдегі баскетболға 100 жыл толып отыр. Қазір бұл спортқа балалар мен жастар арасында қызығушылық артып келеді. Президент, әсіресе  3×3 форматының танылып келетінін айтты. Сондықтан жас баскетболшыларды даярлау мен кәсіби спортшыларға жағдай жасау мәселелеріне жеке тоқталды.

¤

Қасым-Жомарт Тоқаев, Қазақстан Республикасының Президенті:

- Мен баскетболдың жанкүйері болдым. Әлі де анда-санда ойындарды көріп тұрамын. Әрине, қазір баскетболдың тактикасы да, ойыны да түбегейлі өзгерді. Бүгінде жұрт АҚШ-тың NBA ойындарын қызыға көреді. Ал Қазақстанда біз баскетболды одан әрі дамытып, оны жоғары деңгейге көтергіміз келеді. Қазір баскетболдың 5×5, 3×3 сияқты түрлі форматтары бар. Бұрын мұндай бөлініс болмаған, заман өзгеріп жатыр. Ашық айтсам, бізді әсіресе 3×3 баскетболы қызықтырады.

¤

Президент FIBA президентін «Достық» орденімен марапаттады      

Мемлекет басшысы жаһандық спорт ұйымының президенті шейх Сауд Али Әл-Тәниге отандық баскетболды дамытуға қосқан үлесі үшін алғыс білдірді. Осылайша, федерация басшысын ІІ дәрежелі «Достық» орденімен марапаттады.